Rückblick Solothurner Fasnacht

Ungloublich das Gfüeu, ändlech wieder ohni Iischränkige dörfe Fasnacht z mache...

...mit Versterchig vo üsne diesjährige Mitgugger, de Chessuriesser us Wiler, hei mir a däm Schmudo dörfe in Balsthal und Luterbach d Fasnacht iilütte.
In Balsthal heimer i diverse Beize s gmeinsame Repetoire zum Beste gäh und s Fasnachts-Härz het wieder ganz fest afo schloh.

Womer in Luterbach si aacho, si d Määge vo vöune eher läär gsi und d Enttüschig gross, dasses gar nüt meh gäh het für i Maage...
Uf dr Bühni hei mir trotzdäm üses Beste gäh inklusive Zuegab - leider isch in Zwüschezyt s Bier ou no usgange!

Am Fritti heimer mit üsne Uftritte i zwöi Behinderteheim vöu Fröid dörfe verursache.
Nächhär ischs as Ufstöue gange für üsi Chäsichessubrätschrissete - das ganze Gländ het müesse iighaget wärde und zum Schluss hets de drfür es gmeinsams Znacht gäh.

Am Samsti Morge heimer dr Räste vom Festgländ no zwäggmacht: E wahri Fröid, wasme us some Schuelhusplatz aues cha mache!
Dr Petrus hets guet mit üs gmeint und sich vo siner zwar chüele, aber sunnig e Sitte zeigt und so si pünktlech uf die 15.00 Uhr die erste Gescht iitrudlet.

Langsam het sich dä Platz afo föue. Am Nomitag hei vieli Familie -und praktisch aui verchleidet- sich de Guggekläng und dr Bar gwidmet.
DANKE vöumou aune Bsuecher, wo üses spontane Fest ungerstützt hei!
Um die 8i heimir de üse Uftritt gha und üs ouno offiziell vo üsem verstorbne Guggemitglied chönne verabschide: Für immer uf Di, Prime!

Wo sich zum Schluss d Zytgloggeschränzer ou no zu üs gsöut hei, isch dr Platz uf der Bühni scho afe chli äng worde - es het ungloublich Spass gmacht mit öich zämezspiele!

Am Sunnti Morge heimer dr Räste vom Festgländ no ufgruumet bevors de gäge Mittag wieder as Schminke gange isch.
In Biberist hei mir nomou dörfe es Platzkonzärt gäh am Jubiläum vode Ventilblöterler.
Aui chli übermüedet heimer eigentlich früeh hei wöue - us däm isch aber bi einige nüt worde, wöus so ne tolli Party isch gsi!

Jetz heisst sich erhole, bis mir de am Fritti id Bärner Fasnacht starte.
Mir fröie üs sehr ufe zwöiti Teil.

Chäslochbrätscher ♥ Chessuriesser ♥ zämeabhebe!